തിരുവനന്തപുരം: 63-ാമത് സംസ്ഥാന സ്‌കൂള്‍ കലോത്സവത്തിലേക്ക് എല്ലാവരും ഇപ്പോള്‍ ഉറ്റു നോക്കുന്നത്. കലോത്സവത്തിന്റെ മൂന്നാം ദിവസമാണ് ഇന്ന്. ഇന്നും പോയന്റ് നിലയില്‍ മുന്നില്‍ നില്‍ക്കുന്നത് കണ്ണൂര്‍ ജില്ലയാണ്. 449 പോയിന്റുമായി നിലവിലെ ചാമ്പ്യന്മാരായ കണ്ണൂര്‍ ഒന്നാം സ്ഥാനത്ത് തുടരുന്നു. ഇഞ്ചോടിഞ്ച് പോരാട്ടം കാഴ്ച വെച്ച് 448 പോയിന്റുമായി തൃശൂര്‍ രണ്ടാമതും കോഴിക്കോട് മൂന്നാമതുമാണ്. മൂന്നാം ദിനമായ ഇന്ന് പ്രധാന വേദിയില്‍ ഹയര്‍ സെക്കന്‍ഡറി വിഭാഗം പെണ്‍കുട്ടികളുടെ കുച്ചിപ്പുടി മത്സരവും ഹൈസ്‌കൂള്‍ വിഭാഗത്തിന്റെ തിരുവാതിര കളിയും നടക്കും. കോല്‍ക്കളി, ദഫ് മുട്ട്, തുടങ്ങിയ ജന പ്രിയ ഇനങ്ങളും ഇന്ന് വേദിയില്‍ എത്തുന്നുണ്ട്. കഴിഞ്ഞ ദിവസം സദസില്‍ നിറഞ്ഞ നാടകങ്ങള്‍ ശ്രദ്ദിക്കപ്പെട്ടിരുന്നു. ഹെസ്‌കൂള്‍ വിഭാഗത്തില്‍ 202 പോയിന്റുമായി തൃശൂര്‍ ആണ് തലപ്പത്ത്. 200 പോയിന്റോടെ കോഴിക്കോട് രണ്ടാം സ്ഥാനത്ത്. 198 പോയിന്റുമായി കണ്ണൂര്‍ മൂന്നാം സ്ഥാനത്ത്. സ്‌കൂളുകളില്‍ 60 പോയിന്റുമായി തിരുവനന്തപുരം കാര്‍മല്‍ ഹയര്‍ സെക്കന്‍ഡറിയും ആലത്തൂര്‍ ഗുരുകുലം ഹയര്‍ സെക്കന്‍ഡറിയും ഒപ്പം നില്‍ക്കുന്നു. കണ്ണൂര്‍ സെന്റ് തേരാസസ് 56 പോയിന്റുമായി തൊട്ടു പിന്നില്‍.

തൃശൂര്‍: പലതരം ആചാരങ്ങളും അുഷ്ഠാനങ്ങളും ഉള്ള നിരവധി ക്ഷേത്രങ്ങള്‍ കേരളത്തില്‍ ഉണ്ട്. ഓരോ ആചാരങ്ങള്‍ക്കും അനുഷ്ഠാനങ്ങള്‍ക്കും അതിന്റേതായ രീതികളും ഉണ്ട്. ഇപ്പോഴിതാ കേരളത്തിലെ ക്ഷേത്രത്തില്‍ നടന്ന ഒരു ചടങ്ങ് റെക്കോര്‍ഡില്‍ ഇടം നേടിയിരിക്കുകയാണ്. 36,008 നാളികേരമെറിഞ്ഞുള്ള വേട്ടേക്കരന്‍ പാട്ട് ചടങ്ങാണ് റെക്കോര്‍ഡില്‍ ഇടം നേടിയിരിക്കുന്നത്. കേരളത്തിലെ ക്ഷേത്രാചാര ചടങ്ങുകളുടെ ചരിത്രത്തില്‍ ആദ്യമായാണ് ഇത്തരം ഒരു സംഭവം. കുന്നംകുളം കക്കാട് മഹാഗണപതി ക്ഷേത്രത്തിലാണ് ചടങ്ങുകള്‍ നടന്നത്. ലോക ചരിത്രത്തില്‍ ആദ്യമായാണ് ഇത്രയും നാളികേരം എറിഞ്ഞുടയ്ക്കുന്ന ചടങ്ങ് നടക്കുന്നത്. 36,008 നാളികേരം എറിഞ്ഞതിന് ടൈം വേള്‍ഡ് റെക്കോര്‍ഡിന്റെ സര്‍ട്ടിഫിക്കറ്റും അധികൃതര്‍ കൈമാറി. രാവിലെ വിശേഷാല്‍ പൂജകള്‍ക്ക് ശേഷമാണ് പാട്ടിന്റെ ചടങ്ങുകള്‍ക്ക് തുടക്കമായത്. 10.30ന് ഭക്ത ജനങ്ങള്‍ നാളികേരം എണ്ണി കൂട്ടി. വൈകീട്ട് 6 30ന് മുല്ലക്കല്‍ പാട്ടിന് എഴുന്നള്ളിച്ച് രാത്രി 10 മണിയോടു കൂടി നാളികേരം എറിയാന്‍ ആരംഭിച്ചു. എട്ടര മണിക്കൂര്‍ സമയമെടുത്ത് രാവിലെ 6.30ന് നാളികേരം എറിയല്‍ അവസാനിച്ചു. ശേഷം ചടങ്ങുകള്‍ പൂര്‍ത്തിയാക്കി കൂറ വലിച്ച് വേട്ടേക്കരന്‍ പാട്ട് പൂര്‍ത്തീകരിച്ചു. ചടങ്ങുകള്‍ക്ക് ക്ഷേത്രം പ്രസിഡന്റ് കെ കെ സുബിദാസ്, സെക്രട്ടറി സുനീഷ് അയിനിപുള്ളി, ട്രഷറര്‍ ഭാസ്‌കര കുറുപ്പ് എന്നിവര്‍ നേതൃത്വം നല്‍കി.

ഈസ്റ്റ് ലണ്ടന്‍: പാരമ്പര്യം കൊണ്ടും പ്രൗഢി കൊണ്ടും അംഗബലം കൊണ്ടും യുകെയിലെ തന്നെ പ്രമുഖ സംഘടനകളില്‍ ഒന്നായ ഈസ്റ്റ് ലണ്ടന്‍ മലയാളി അസോസിയേഷന്റെ പതിനേഴാമത് ക്രിസ്മസ് പുതുവത്സരാഘോഷം വളരെ പ്രൗഢഗംഭീരമായി ഈ മാസം പതിനൊന്നിന് ശനിയാഴ്ച രണ്ടു മണി മുതല്‍ ലണ്ടനിലെ ഹോണ്‍ ചര്‍ച്ചില്‍ ഉള്ള ക്യാമ്പ്യന്‍ സ്‌കൂള്‍ ഓഡിറ്റോറിയത്തില്‍ വച്ച് വളരെ വിപുലമായി ആഘോഷിക്കുന്നു. വ്യത്യസ്തത കൊണ്ടും പരിപാടികളുടെ ബാഹുല്യവും ഉയര്‍ന്ന നിലവാരവും കൊണ്ടും വേറിട്ടു നില്‍ക്കുന്ന ഈ മലയാളി അസോസിയേഷന്‍ ഇത്തവണയും വേറിട്ട പരിപാടികളുമായാണ് എത്തുന്നത്. കൃത്യം രണ്ടുമണിക്ക് തന്നെ ആരംഭിക്കുന്ന ആഘോഷം മികവുറ്റതാക്കാന്‍ വ്യത്യസ്തമായ കലാസാംസ്‌കാരിക പരിപാടികള്‍ അണിയറയില്‍   ഒരുങ്ങിക്കൊണ്ടിരിക്കുന്നു. സംഗീതവും നൃത്തവും നാടകവും തമാശയും എല്ലാം കോര്‍ത്തിണക്കിയുള്ള വ്യത്യസ്ത പരിപാടികള്‍ മികവുറ്റതാക്കാന്‍  വിവിധ കമ്മിറ്റികളുടെ നേതൃത്വത്തില്‍ അഹോരാത്രം പരിശ്രമിക്കുകയാണ്. ഈ അവസരത്തില്‍ തന്നെ പ്രശസ്ത മലയാള സിനിമ സംവിധായകന്‍ ജയരാജിന്റെ സംവിധാനത്തില്‍ ഒരുങ്ങുന്ന ശാന്തമീ രാത്രിയില്‍ എന്ന സിനിമയുടെ ഓഡിയോ ലോഞ്ചും നടക്കുന്നു. ആടുജീവിതം ഫെയിം ഗോകുല്‍, ദൃശ്യം ഫെയിം എസ്തര്‍ അനില്‍ എന്നിവര്‍ പ്രധാന വേഷത്തില്‍ അഭിനയിക്കുന്ന ഈ ചിത്രത്തില്‍ പ്രശസ്ത അഭിനേതാക്കളായ ടിനി ടോം, കൈലാഷ്, പ്രമോദ് വെളിയനാട്, സിദ്ധാര്‍ഥ് ഭരതന്‍, മാല പാര്‍വതി, വിജി വെങ്കിടേഷ്, ജീന്‍ പോള്‍ ലാല്‍, അര്‍ജുന്‍, നേഹ എന്നിവരും അണിനിരക്കും. ഇവരില്‍ എസ്തര്‍ അനില്‍ അടക്കമുള്ള പല അഭിനേതാക്കളുടെയും അണിയറ പ്രവര്‍ത്തകരുടെയും നിര്‍മ്മാതാക്കളുടെയും സാന്നിധ്യവും ഉണ്ടാകും. ഇങ്ങനെയൊരു പരിപാടി സംഘടിപ്പിക്കാന്‍ സാധിച്ചതിന്റെ സന്തോഷവും അഭിമാനവും എല്ലാ എല്‍മ അംഗങ്ങളിലും പ്രകടമാണ്. രുചികരമായ തനി നാടന്‍ കേരളീയ ഭക്ഷണവും, ഡിജെയും കൊണ്ടു സമ്പന്നമായ ഈ പരിപാടിയിലേക്ക് എല്ലാവരെയും സ്വാഗതം ചെയ്യുകയും പരിപാടിയുടെ വിജയത്തിനായി എല്ലാ അംഗങ്ങളുടെയും പിന്തുണയും പങ്കാളിത്തവും സഹകരണവും അഭ്യര്‍ത്ഥിക്കുന്നതായി എല്‍മയുടെ ഭാരവാഹികള്‍ ആയ എക്സിക്യൂട്ടീവ് കമ്മിറ്റി അംഗങ്ങള്‍ അറിയിച്ചു.

യുഎസ്: എല്ലാ ധാരണകളും തെറ്റിച്ചു കൊണ്ട് മിതമായ മദ്യപാനവും ക്യാന്‍സര്‍ സാധ്യത വര്‍ധിപ്പിക്കുമെന്ന മുന്നറിയിപ്പുമായി യുഎസ് സര്‍ജന്‍ ജനറല്‍ ഡോ. വിവേക് മൂര്‍ത്തി. ഈ പശ്ചാത്തലത്തില്‍ സിഗരറ്റ് പാക്കറ്റുകള്‍ക്ക് എന്നതു പോലെ മദ്യബോട്ടിലുകളിലും ക്യാന്‍സര്‍ സാധ്യതാ മുന്നറിയിപ്പ് നല്‍കണമെന്നും അദ്ദേഹം ആവശ്യപ്പെട്ടു. ലഹരി പാനീയങ്ങള്‍ ഏഴ് തരം ക്യാന്‍സറുകളുമായി ബന്ധമുണ്ടെന്നാണ് പുതിയ ഗവേഷണം. പുകയിലയ്ക്കും പൊണ്ണത്തടിക്കും പിന്നാലെ ക്യാന്‍സറിന് കാരണമാകുന്ന സാധാരണമായ മൂന്നാമത്തെ കാര്യമാണ് മദ്യാപനമെന്നും സര്‍ജന്‍ ജനറല്‍ പറഞ്ഞു. സ്തനാര്‍ബുദം (സ്ത്രീകളില്‍), തൊണ്ട, കരള്‍, അന്നനാളം, വായ, ശ്വാസനാളം, വന്‍കുടല്‍ എന്നീ ഏഴ് തരം ക്യാന്‍സറുകള്‍ക്ക് മദ്യപാനം കാരണമാകും. ഭൂരിപക്ഷം അമേരിക്കക്കാര്‍ക്കും ഈ അപകടസാധ്യതയെക്കുറിച്ച് അറിയില്ലെന്ന് യുഎസ് സര്‍ജന്‍ ജനറല്‍ കൂട്ടിച്ചേര്‍ത്തു. യുഎസില്‍ പ്രതിവര്‍ഷം ഒരു ലക്ഷം കാന്‍സര്‍ കേസുകളാണ് റിപ്പോര്‍ട്ട് ചെയ്യുന്നത്. 20,000ത്തോളം ആളുകള്‍ കാന്‍സര്‍ ബാധിച്ച് മരിക്കുന്നുണ്ട്. അമേരിക്കയില്‍ 1988 മുതല്‍ മുന്നറിയിപ്പ് ലേബലുകള്‍ അപ്ഡേറ്റ് ചെയ്തിട്ടില്ല. ഇതിന് യുഎസ് കോണ്‍ഗ്രസിന്റെ നടപടി ആവശ്യമാണ്.

ഒരു ഇന്‍സ്റ്റന്റ് മെസേജിങ് ഫീച്ചറായ വാട്സ്ആപ്പ് ഇപ്പോള്‍ മനുഷ്യന്റെ ദൈനംദിന ഉപയോഗത്തിന്റെ ഭാഗമായി മാറിയിരിക്കുകയാണ്. നിരവധി പേരാണ് വാട്സ്ആപ്പ് ഉപയോക്താക്കളായി ഇന്ത്യയില്‍ ഉള്ളത്. പുത്തന്‍ ഫീച്ചറുകള്‍ പരിചയപ്പെടുത്തോടെ വാട്സ്ആപ്പ് കൂടുതല്‍ ജനപ്രിയമാകുകയാണ്. പുതുവര്‍ഷത്തില്‍ പുത്തന്‍ ഫീച്ചര്‍ പരിചയപ്പെടുത്താന്‍ ഒരുങ്ങുകയാണ് വാട്സ്ആപ്പ്. കഴിഞ്ഞ വര്‍ഷം അവസാനത്തോടെ തന്നെ തന്നെ നിരവധി ഫീച്ചറുകള്‍ വാട്സ്ആപ്പ് പരിചയപ്പെടുത്തി കഴിഞ്ഞു. ഇപ്പോഴിതാ അതിന്റെ ബാക്കിയെന്നോണം പുതിയ ഫീച്ചറാണ് വാട്സാപ്പിലൂടെ ഉപയോക്താക്കളിലേക്ക് എത്തുന്നത്. ഐഫോണ്‍ ഉപഭോക്താക്കള്‍ക്ക് വേണ്ടിയാണ് വാട്സാപ്പിന്റെ പുതിയ ഫീച്ചര്‍. ഇനി വാട്‌സാപ്പിലെ ക്യാമറ ഉപയോഗിച്ച് ഡോക്യുമെന്റുകള്‍ സ്‌കാന്‍ ചെയ്യാനാവുന്ന പുതിയ രീതിയാണ് പരിചയപ്പെടുത്തുന്നത്. നേരത്തെ ഇതിനായി മറ്റ് ആപ്പുകളെ ആശ്രയിക്കേണ്ടിയിരുന്നു. പ്രിന്റ് ചെയ്തതോ എഴുതിയതോ ആയ ഒരു പേപ്പര്‍ സ്‌കാന്‍ ചെയ്ത് പിഡിഎഫ് രൂപത്തില്‍ മറ്റൊരാള്‍ക്ക് അയച്ചുകൊടുക്കുന്നതിനും ഈ സൗകര്യം സഹായിക്കും. വാട്‌സാപ്പില്‍ എങ്ങനെ ഡോക്യുമെന്റുകള്‍ സ്‌കാന്‍ ചെയ്യേണ്ടത് എന്ന് നോക്കാം:     വാട്‌സാപ്പില്‍ ഒരു ചാറ്റ് വിന്‍ഡോ തുറക്കുക     ഇടത് ഭാഗത്ത് താഴെ ആയുള്ള + ബട്ടണ്‍ ടാപ്പ് ചെയ്യുക     ഡോക്യുമെന്റില്‍ ടാപ്പ് ചെയ്യുക     അപ്പോള്‍ സ്‌കാന്‍ ഡോക്യുമെന്റ് ഓപ്ഷന്‍ കാണാം     അതില്‍ ടാപ്പ് ചെയ്താല്‍ ക്യാമറ തുറക്കും.     ഏത് ഡോക്യുമെന്റാണോ പകര്‍ത്തേണ്ടത് അതിന് നേരെ ക്യാമറ പിടിച്ചതിന് ശേഷം ക്ലിക്ക് ചെയ്യുക.     മുഴുവന്‍ പേജുകളും ഈ രീതിയില്‍ പകര്‍ത്തി ക്കഴിഞ്ഞാല്‍ Save ബട്ടണ്‍ ടാപ്പ് ചെയ്യുക.     നിങ്ങള്‍ സ്‌കാന്‍ ചെയ്ത പേജുകള്‍ പിഡിഎഫ് രൂപത്തില്‍ അയക്കാനുള്ള ഓപ്ഷന്‍ കാണാം.     സെന്റ് ബട്ടണ്‍ ടാപ്പ് ചെയ്താല്‍ ഈ ഡോക്യുമെന്റ് മറുവശത്തുള്ളയാള്‍ക്ക് ലഭിക്കും.